கோடுகளால் ஆனது உலகு - சு.மு.அகமது

நாளை மறுபடியும் நான்
காட்சிப் பொருளாகலாம்

கண்ணிமைக்கும் இடைவெளியில்
பெருவெளிகளை கடக்கலாம்

பின் தொடரும் வாசத்தால்
கலவரப்பட்டுப் போகலாம் எம் மனது

ஒரு வாகனத்தின் வருகையால்
நிறுவப்படும் பயண எத்தனிப்பு போலும்
நிகழ்வுகளின் கோடு பிடித்து
நிலை நாட்டப்படலாம் உறவு

உலகியற் சார பிழிதலில்
வழிந்தோடலாம் எமது ’கையாலாகா’த்தனம்

எம்மவர்க்கே நாம் எதிர்வினையாற்றலாம்
நிலையற்ற கயமை நெஞ்சோடு

நெளியும் பாம்பனைய
மண்புற்றின் சகதிக்குள் அய்க்கியமாகலாம்
உலகுசார் எமது பரந்த எண்ணங்கள்

கோடுகள்...
ஒரு புள்ளி தொட்டு மறுபுள்ளி வரை பயணிப்பவை
இலக்கு...
புள்ளிகள் தொடுதல் தானா?