இரவு நேரக் குறிப்பு - ப.மதியழகன்

வீதியின் இறுதி வரை
ஆட்களில்லை
அடர்த்தியான இருள்
நிரம்பியிருந்தது

இன்றைக்கு வேலைப் பளு
அதிகமென்பதால்
நித்திரையில் ஆழ்ந்துவிட
உள்ளம் துடித்தது

பின்புறமாக வந்த நாயொன்று
எனது பையை மோப்பம் பிடித்தது

பிச்சை பாத்திரத்திலுள்ள ஆகாரம் போல
வீடு கலைந்து கிடந்தது

மேஜையிலிருந்த எனக்கான குறிப்பில்
இன்றாவது சீக்கிரம் வரக்கூடாதா
என எழுதியிருந்தது

அடுக்களையிலிருந்த பூனையை
விரட்டியடித்தேன்
எனக்கானதை எடுத்து
தின்றுவிடுமோ என்ற பயத்தில்

எப்போதும் விட்டம் பார்த்து
ஐந்து நிமிடம் படுத்துக் கிடப்பது
எனது வழக்கம்

தினசரி காலண்டரில்
தேதியைக் கிழிப்பது போல்
அன்றைக்கு நடந்த
அவமானங்களையும்,
ஏளனங்களையும்
மனதை விட்டு விரட்டுவதற்கான
நேரமது