Photo by Pawel Czerwinski on Unsplash
கோடானு கோடி
காலடிச்சுவடுகள்
பதிந்து பதிந்து
அழிந்து மாறும்
கடற்கரை இது.
எந்த காலடிச்சுவட்டையும்
ஆக்ரோஷமாக
அழிக்கிற அலைகளைக்
கரையோரம் அமர்ந்து
கவனித்தேன்
கரையோரத் தென்னையின்
நிலவொளி பூசிய
புதிய ஓலைகளினூடே
நடந்து போனவர்களின்
இரவுகளும் பகல்களும்
குடியேறியிருப்பது
கண்ணில் பட்டது
அலைகள் அவற்றை அழிப்பதில்லை
புது வருகைக்குத்
தடம் போடுகிறது
அலை கரையைக் காதலிக்கிறது
கரை அலையைக் காதலிக்கிறது
நிறைவேறவே நிறைவேறாத
இந்தக் காதல் நாடகத்தை
ஒதுங்கி நின்று வேடிக்கை பார்
தென்னை சலசலத்து சொல்கிறது
வையவன்
