உனக்கான நாட்கள் - ரமா

உனக்கான நாட்களில்
கொஞ்ச நேரம் உன் மனதுடன்
கோபித்துக் கொள்ளலாம்..
யாருக்கும் தெரியாமல்
கண்ணாடி முன்
ராம்ப் வாக் செல்லலாம்..
சிரித்துக் கொண்டே அழலாம்
அழுது கொண்டே யாருக்காகவோ
சிரிக்கலாம்...
உனக்கான கவிதைகளை நீயே எழுதிக்
கொள்ளலாம்
எதிர்கால கனவுகளை உன் மனதுக்குள் அசைபோட்டுக் கொண்டே டோப்பமின்னை சுரக்க வைக்கலாம்
கடந்த கால கசப்புகளை சிறிது சிறிதாக வடிகட்டி உனக்கான தெரபிஸ்ட் ஆக நீயே ஆகலாம்...
மல்லாந்து படுத்துக் கொண்டு
அலைபேசியில் கிசு கிசுகள் பேசலாம்..
பிடித்த புத்தகத்தின் தூண்டிலில்
மீண்டும் ஒரு முறை சுகமாக மாட்டிக் கொள்ளலாம்...
மைக்கல் ஜாக்சனாகவே மாறி பீட் இட்
பாட்டுக்கு உனக்கு தெரிந்த வரிகளை உரக்க பாடிக் கொண்டே வெஸ்டர்ன் ஆடலாம்...
உன் வீட்டின் மூலையில்
உனக்காகவே காத்திருக்கும்
ரோஜா மலரை மெல்ல முத்தமிடலாம்...
ஒரு வேளை எழும்ப மனமில்லாமல்
அந்த நாளை கட்டிலிலேயே கழிக்க
விரும்பினால் ...
உன்னை நீயே அணைத்துக் கொண்டு
உன் பாரங்களை தலையணையிடம்
தந்து விட்டு நிம்மதியாக உறங்கி விடு
நாளை உனக்காகவே காத்திருக்கும்....