என் வீட்டுத் தோட்டம் - எட்வின் பிரிட்டோ

 
மயிர்க் கால்களில் மகரந்தம் விதைத்து,
தென்னையின் தலைக்கோதிப் போகும்
மார்கழி இளந்தென்றல்.

'என்னருகே வா' என்று
இறகுச் சிமிட்டும் பட்டாம்பூச்சி.

துளித்துளியாய் அழகு சொட்டும்
பனிப்பூத்த ரோஜா.
அவ்வப்போது என்னைப்
புன்னகைக்கச் சொல்லி
புகைப்படமெடுத்துப் போகும்
மின்மினிப் பூச்சிகள்.
ஓடி வந்த வண்டுகளின் களைப்பு நீங்க
தேன் குவளையேந்தும் மலர்ச்செடிகள்.

கிளைகளினூடே விரல் நீட்டி
நிழல் தொட்டுப் பார்க்கும் சூரியன்.

பாடி முடித்த பறவைகளுக்கு
பாராட்டுதலாய் கிளைத்தட்டும் மரங்கள்.

இன்னும் பல இவைப்போல்
வர்ணம் குழைத்துப் பூசுமென்
கறுப்பு வெள்ளை வாழ்க்கைக்கு